政壇：葉劉怒轟「雙曾」累港
近年每逢有全球性經濟競爭力報告發表，香港嘅排名都好似得個跌字。有份見證香港競爭力「興衰」嘅立法會議員葉劉淑儀，旗下匯賢智庫會展開一個香港長遠競爭力研究，但唔使等到研究完成，葉劉尋日已率先狠批「雙曾」，包括批評「貪曾」前特首曾蔭權爵士當年提出大搞六大優勢產業唔湯唔水，而財爺「鬍鬚曾」曾俊華就一味講競爭力自由度，其他就忽略晒。
葉劉批評貪曾當年提出大搞六大優勢產業，包括教育、醫療及創新科技等，但去到依家都仲係「發展模糊」。至於鬍鬚曾一直講提升經濟競爭力，但就淨係識講競爭力自由度。佢話其實好多國際研究都唔會齋講自由度，軟實力、硬實力及創新力，通通都要講，仲話事實上本港經濟增長，已經連續三年跌穿百分之三，之前嗰幾十年都未試過，實在不容忽視喎。
何濼生：香港被「陰乾」
有見及此，葉劉做主席嘅匯賢智庫將會用十五個月時間，做一個本港長遠競爭力研究，睇吓支柱同新興行業仲有乜嘢發展機會，當中特別同「全國港澳研究會」合作，睇吓內地新設自貿區等對香港會造成乜嘢影響。研究搵嚟多個界別專才加入督導委員會畀意見，包括工商專業聯會主席黃友嘉、金銀業貿易場監事長張德熙同立法會旅遊界議員姚思榮等。
不過，葉劉強調研究唔係要追究邊個責任，只想搵出香港究竟出咗乜嘢事，再將結果同建議交畀政府。負責研究嘅嶺南大學經濟系教授何濼生就話，香港依家好似被人「陰乾」緊，再唔長進就會繼續墮後，搞到葉劉臨尾都忍唔住好慨嘆咁話，港人以至政府都係時候反省下嘞。身兼港區全國人大代表嘅亞太眼科醫學院會長林順潮都擔心，政治爭拗製造嘅負能量最終會令香港被邊緣化，希望社會多啲考慮整體福祉作出抉擇。
