基建超支延誤成風,市民早就見怪不怪,特別係高鐵,直頭可以用多災多難嚟形容。最大鑊嘅係,即使順利完工,高速鐵路亦可能淪為「低速鐵路」,問你服未!

唔係亂噏。立法會交通事務委員會主席田北辰透露,由於中央仲未就一地兩檢拍板,九龍總站嘅設計同招標工作無法展開,如果未來幾個月仍得唔到解決,一七年通車嘅目標肯定凍過水。佢仲話,最壞嘅情況係旅客要喺香港同深圳兩地兩檢,到時高鐵唔係「快啲嘅直通車」,而係仲慢過直通車。

唔係啩,高鐵香港段得廿六公里,但造價節節上升,最新預算九百億元,已經被譏為「黃金鐵路」,點知到頭來仲慢過直通車,你話係咪攞嚟搞吖。前港鐵行政總裁周松崗曾講過,如果唔實行一地兩檢,等於將高鐵廢咗武功,唔通真係一語成讖?

當然喇,高鐵工程問題多多,又點止一地兩檢搞唔掂吖。截至今年三月底,高鐵工程整體進度又比舊年修訂嘅滯後五個百分點,較上季度再擴大兩個百分點,連港府都承認一七年通車「存在好大風險」。

唔使問阿貴,工程滯後,造價自然水漲船高。港鐵下月底向港府提交工程最新預算,到時會唔會突破九百億元大關,真係冇人敢寫包單。運房局局長張炳良拍晒心口,話會把好關,唔會隨便接受港鐵估算嘅時間表同成本等修訂數字,又話港府會保留針對港鐵工程管理以及延誤超支嘅追究權利喎。

嗱,講就好聽嘞,做唔做到就要睇過至知。好簡單,高鐵工程已經洗濕咗個頭,如果依家叫停,之前使咗嘅幾百億元等於倒落鹹水海,港鐵打死狗講價,唔到港府唔接受。如果要追加撥款,過立法會嗰關仲難過登天,超支數以百億元計,連建制派議員都唔敢隨便開綠燈,何況反對派。至於追究責任咯喎,港鐵藉口多多,一味賴工程複雜,早就為日後卸責鋪路。一旦對簿公堂,唔單止曠日持久,訟費咪又係由納稅人埋單。

冇計啦,前朝貪曾政府好大喜功,基建工程大幹快上,可惜眼高手低,監管不力,唔烏龍百出至奇喇。有人擔心幾百億元高鐵工程爛尾收場,淪為國際大笑話。其實計太一叮話齋,如果高鐵爛尾,何止係國際大笑話,直頭係香港大災難添呀,叮!

第一手消息請下載on.cc東網iPhone/iPad/Android/Windows Phone Apps