城中兩大商會行政總裁一職相繼出缺,香港工業總會行政總裁蘇家碧,就被港鐵高薪挖角出任公司事務總監,九月便會離任。而中華廠商聯合會(廠商會)行政總裁黃靜文又決定約滿不續約,廠商會唔想費神請人,決定內部提升,先以短期合約方式請番同屬退休高官嘅前行政總裁梁世華(Paul)做住先,然後幫手訓練行政部門同事接棒。

(設計圖片及對白)

廠商會會長李秀恒證實上述安排,佢話過往廠商會請前高官做行政總裁,係要借助佢哋嘅行政管理能力,同埋與政府嘅良好關係做彼此嘅溝通橋樑,但隨住廠商會與政府溝通無間,現時行政總裁嘅主要任務,反而係注重內部管理及溝通。而阿Paul雖然享受緊悠閒退休生活,但佢係廠商會少見嘅四朝元老,歷任洪克協、尹得勝、黃友嘉及施榮懷四位會長,好合適,而且阿Paul又爽快應承。咁短期合約即係幾耐?李秀恒話一年之內叫做短期,但合約具體細節仍待落實。

問番阿Paul,佢形容重返廠商會係「始料未及」,但同李係相識二十幾年嘅老友,好樂意喺非常時期返去幫手。阿Paul又話,佢喺廠商會做過六年行政總裁,今次重返駕輕就熟,因此太太都支持佢嘅決定。至於退休享受人生,咪遲些少再歎過囉!話時話,啲退休高官出路多,但又令啲商會面對成日要頭痕請人嘅困局,真係有辣有唔辣。

第一手消息請下載on.cc東網iPhone/iPad/Android/Windows Phone Apps