香港政制發展到咗關鍵時刻，著名堪輿學家蔡伯勵日前應邀開講，主題係中國陰陽五行及堪輿嘅現代科學觀，民政事務局前局長何志平及香港大學專業進修學院院長李焯芬等都有到場，席間大家好關心政改可唔可以通過，請大師指點迷津，何志平仲好肉緊咁追問下月二十四日及七月八日（即立法會本年度最後一次大會）係咪吉日，能否順利通過政改？李焯芬都忍唔住笑佢，唔係局長仲咁操心！

蔡伯勵（中）開講，李焯芬（左）及饒宗頤文化館管理委員會副主席黃景強齊捧場。

蔡伯勵話，順應民意，政改通過嘅機會好大，仲暗示當局唔會好似去年咁，乜都放縱唔理。至於何志平問七月八日係咪好日？蔡伯勵答：「當日係好日，會有圓滿嘅結果」。但何志平仲唔滿意，再問六月二十四日係咪可以通過政改？蔡伯勵有問必答，話嗰日都係好日，仲話喺好日通過政改，市民應該有好日子過。點解何志平咁緊張呢？佢笑稱政改同全港市民有關，自己當然關心，又話退休後好得閒，所以都會睇通勝行事。

觀塘區議會主席陳振彬都有到場，佢同蔡伯勵相識十幾年，每年都收到大師送嘅流年預測，講講吓，佢自爆近月炒股大豐收，勁賺七位數字添！

第一手消息請下載on.cc東網iPhone/iPad/Android/Windows Phone Apps