政壇：泰國公主 中環出巡
平日名人匯集嘅中環昨日更添皇室貴氣。泰國國王普密蓬長女烏汶叻公主（Ubolratana Rajakanya），傍晚六時許喺大批隨從及保鏢陪同下現身中環置地廣場。烏汶叻公主保養得宜，而且童心未泯，佢身穿米奇老鼠圖案外套配迷你裙，完全唔似已經六十四歲。
烏汶叻（左）打扮年輕時尚，完全唔似已屆花甲之年。
行街期間，公主全程笑笑口，不時與同行隨從指手畫腳傾談，又不停穿梭名店，睇完手袋又揀鞋，部分商店亦相當識做，刻意封舖畀佢安心購物。不過，公主最終空手而回。聽聞公主今次係私人性質訪港。
