政壇：高官避忌拋寶牒縮沙
政府同建制派落力宣傳政改一定得，尋日新界鄉紳喺大埔林村搞咗個千人許願活動，民政事務局局長曾德成都以署理政務司司長身份出席，不過，佢就顯得戒懼戒慎，連許願嘅傳統儀式，即向許願樹擲寶牒，德成局長都唔敢親身上陣，臨陣「縮沙」，唔通佢擔心寶牒擲唔中，會搞到政改得個吉？
（設計圖片及對白）
有人驚青，但高逾六呎嘅立法會議員何俊賢（高佬賢）就冇有怕，佢伸高隻手已可將寶牒綁上樹，贏硬喇！
話明千人許願撐政改，擲寶牒自然係活動重頭戲，鄉議局副主席張學明帶領部分立法會議員同鄉紳先嗌撐政改口號，然後一齊擲膠桔寶牒，誠心祝願政改一定得！不過，德成局長只係傍住鄉議局主席劉皇發（發叔）敲銅鑼，冇跟大隊擲寶牒，聽聞係大會安排咁話。我哋事後問大會，大會話梗係有邀請「司長」啦，但以署理司長身份出席嘅德成局長話，擲寶牒係新界人傳統，交番畀主人家做就得喇。
不過德成局長就踴躍簽名，活動開始前已簽名撐政改，仲係第一個參與簽名活動嘅高官，只係現場有個模擬投票，德成局長接過職員嘅模擬選票睇吓，笑笑口話選票只係宣傳用，真嘅投票要保密喎，一樣唔肯親自投票。
高佬賢用手掛唔使掟
出席同一活動嘅漁農界議員高佬賢，就充分發揮身高優勢，擲完自己隻寶牒，又執起地下嘅膠桔再擲，最後索性親手綁膠桔上樹，保證政改一定得，但會唔會有啲「賴貓」呢？高佬賢話，就算賴貓都係為咗政改一定要得！
