香港郵政拒認帳 鑊鑊醜聞鑊鑊甘

話說香港郵政經營不善，○八年聘請荷蘭顧問公司進行改革研究，檢視喺本地及國際郵政同速遞服務最新發展下嘅營運狀況，並提供建議方案。點知研究報告出咗之後，香港郵政唔止唔肯採納，仲話報告質素唔達標，之後就終止合約，冇晒下文。

事實究竟係點嘅呢？不妨聽吓顧問嘅回應。該公司負責人強調，研究報告指出香港郵政多個營運問題，包括過分依賴傳統郵遞服務、欠缺創新、郵費比其他國家高等等，再唔改革就會面臨虧損。可惜香港郵政完全聽唔入耳，所謂「唔達標」，根本就係「唔啱聽」。

唔啱聽都算嘞，香港郵政居然無賴到連四百幾萬元顧問費都賴帳，唔怪得洋顧問狠批港府簡直係無法無天嘅「香蕉共和國」，即係好似中美洲嗰啲落後小國咁解。香港郵政仲喺度死撐，稱合約未完成，唔應該全數支付顧問費用，又話政府同顧問公司經仲裁程序處理有關事宜，但基於保密條款，唔可以透露具體內容喎。其實，正如立法會議員話齋，香港郵政單方面指摘顧問公司研究質素欠佳，並中途終止合約，做法極唔尋常，由於涉及公帑，當局有必要向公眾交代。

話時話，顧問報告建議提供速遞、網上郵政以及物流等服務，一啲都冇講錯，如果香港郵政接納建議，進行改革，就唔使年年虧蝕啦。最好笑嘅係，港府成日以為洋和尚會唸經，結果烏龍百出，依家連洋和尚唸經都唔肯聽，你話係咪唔衰攞嚟衰吖。

講開香港郵政嘅醜聞，簡直一匹布咁長。因為管理混亂，經營不善，淨係過去兩個財政年度就蝕咗過億元。面對咁嘅困局，郵政官僚唔係諗辦法改善服務，反而諗縮數，唔係縮短服務時間就係索性關閉郵局，引起市民怨聲載道。最離譜嘅係，香港郵政頻頻「失信於民」，平均一日唔見超過十封信。咁都未算吖，香港郵政仲充當政治打手，滋擾正義傳媒，舊年爆出涉嫌違例滋擾東方報業集團嘅醜聞，拖咗超過五個月，上個月話就話完成調查，點知賴得就賴，連道歉都冇句，簡直豈有此理！

所以話，香港郵政烏煙瘴氣，唔使顧問公司研究都知道冇得救嘅喇，與其繼續獻世，不如早執早着，叮！