政壇：搞搞政：民陣召十萬人反政改 戴耀廷話唔再搞佔領
政改方案提交立法會表決嘅日子愈嚟愈近，本港泛民又動作多多，民間人權陣線召集人陳倩瑩揚言，要喺立法會表決時號召十萬人集會反政改，另一場佔領行動係咪嚟緊？佔中三子之一嘅戴耀廷尋日就縮定先，佢話，唔會再發動佔領，自己已完成咗歷史任務喎，而且泛民已經決定咗否決方案，再搞集會，都只係得表態嘅作用。話係咁講，但佔中三子反口覆舌有前科，真假都係聽住先。
（設計圖片及對白）
跌落地拃沙
何況，去年嘅佔領行動令市民深惡痛絕，戴耀廷即使「吹雞」，都未必有人睬佢，佢預早講定，或者係跌落地揦拃沙先啦。咁啱尋日有網台向佔中三子頒予「二○一四年風雲人物」，另一佔中搞手陳健民就話，諗起佔領行動啟動後三子「靠邊站」、改由學生主導，到依家學聯嘅退聯潮，佢最深嘅感受就係「盛極必衰」喎！唔知佢係咪後悔發起呢場令社會撕裂嘅運動呢？
講番民陣要搞十萬人包圍行動，佔領行動後，泛民主派已經變成一盤散沙，有冇十萬人上街，真係大疑問。而且，呢幾月相繼有大學學生會退出學聯，學聯面臨瓦解之外，另一佔領主角學民思潮喺行動中又備受質疑，號召力大不如前，嚟緊嘅十一月，又有一場全港性選舉，泛民政黨自顧不暇，種種因素下，睇定啲、少吹水可能係明智嘅。
