政壇：靚女趙哲妤退出新民黨
時有黨員「進出」嘅新民黨再有靚女黨員退黨。前年入黨嘅性感模特兒兼前中國小姐香港賽區冠軍趙哲妤（Uny）上周去信申請退黨，獲新民黨口頭批准。Uny即以「翠怡區居民關注會」幹事身份喺青衣懸掛橫額，以靚女大頭照作招徠，祝願街坊母親節快樂。
趙哲妤因工作關係經常作性感打扮。（受訪者提供圖片）
青衣懸掛橫額以靚相作招徠。（受訪者提供圖片）
聽聞新民黨黨主席葉劉淑儀對Uny一直好不滿，仲隨身攜帶Uny性感剪報向人吐苦水，指佢影響黨形象兼「好羞家」。Uny就話，同葉太仍保持良好關係，但佔領行動後該黨立場「比較藍絲」，理念分歧下萌生去意。佢自言未有資格斷定黃絲、藍絲誰是誰非，冀以理性、務實態度服務地區。另外Uny亦積極進修，下月將修畢公開大學應用英語語言學碩士課程。
葉太接受查詢先知Uny已申請退黨，但冷淡回應「冇乜所謂，唔係損失」，又指Uny只係一般黨員，亦無意栽培佢參選，尊重她退黨決定喎！
