政壇：民主阿婆 勾結外國勢力？
政改之爭踏入了倒數的階段，「搞事四人幫」其中三名成員壹傳媒集團前主席黎智英、「李漢奸」民主黨創黨主席李柱銘、以及「反叛主教」天主教香港教區前主教陳日君，近日就頻頻密會密謀攪局，餘下一名組員「民主阿婆」前政務司司長陳方安生，又點會甘於寂寞呢？尋晚一個有頗多政商界同傳媒中人出席嘅籌款晚宴上，就發現過往甚少出席有關活動嘅陳太現身，同枱仲有美國駐港總領事夏千福、歐盟駐港辦事處主任彭家傑等大批外國人，唔通又想勾結外國勢力？
陳太（右）尋晚喺一個籌款晚宴宴請夏千福（左）。
稱首次買枱
民主阿婆解釋，今次佢首次喺呢個場合買枱籌款，同政改無關，除咗夏千福同彭家傑，其他獲邀人士大多係外國通訊社嘅駐港記者。不過佢同時又自爆，尋日高調訪港與特首梁振英同多名立法會議員會面嘅三名美國國會議員，原來喺早一日已經同佢見過面，講到自己好似好威咁！唔通佢係對加拿大國會冇邀請佢去「唱衰香港」心中有刺？
不過，其實無論係英、美或歐盟，均已先後對本港政改表明立場，佢哋唔係明確支持香港人將現有方案「袋住先」，就係刻意保持沉默變相拒撐泛民，如果民主阿婆諗住請人食餐飯就可以令到對方出聲反對政改，咁就真係太簡單同幼稚嘞！
