政壇：肥亨重遇陳文鴻話當年
財經事務及庫務局前局長馬時亨（肥亨）同前財政司司長梁錦松係港大同窗兼老友係人都知，但原來同年嘅同學仲有理大中國商業中心主任陳文鴻。一九七○年，馬、陳同年入讀港大，第一年修讀經濟時已同班，兩個港大老鬼日前再度碰頭即搭晒膊頭講當年，肥亨大讚陳文鴻當年出任《學苑》總編輯好叻仔，又話自己早於七一年已經透過「真普選」獲選加入港大學生會評議會，且冇出入閘門檻，好民主喎！
馬時亨（右）重遇陳文鴻（左），搭晒膊頭「話當年」。
肥亨喺ontv東網電視嘅錄影廠重遇陳文鴻講起往事，當年陳文鴻出版《學苑》，曾經試過日賣四千八百份，肥亨就笑言嗰陣自己喺出邊教書賺外快，跑四間學校，教英文同歷史。頭兩年港大生涯除咗做嘢同搞活動，幾乎冇返學，直至第三年為咗順利畢業，先借錢入住學校宿舍專心讀書，同陳文鴻嘅典型書生路線的確唔同。
愈玩愈激嘅港大學生會早前成為首間退出學聯嘅院校，搞到滿城風雨，二人講起母校呢批新生代都好感慨，肥亨話依家《學苑》嘅影響力已遠遠不及當年，陳文鴻除咗強調絕對唔認同《學苑》早前嘅港獨論外，仲話依家嘅學生淨係識「搞baby嘢」。二人對呢代年輕人，都講到擰擰頭。
