政壇：揀老婆喻政局 言論捱批
講起政改，唔同陣營嘅人拗起上來好易火紅火綠。近日，有人以「阿媽幫手揀老婆」嚟比喻中央同香港處理政改一事，呢個比喻本來係個茶客「挑機」落區派單張嘅行政會議成員陳智思之言，日前，建制派立法會議員吳亮星又引用一番，佢話，「媽媽同你揀埋老婆又點樣？過去幾千年都係咁啦！」呢番言論喺網上引發好多討論，有人批評九唔搭八，尋日連同為建制陣營嘅油尖旺區議員莊永燦都覺唔啱聽，佢斬釘截鐵咁話，選特首係七百萬人嘅事，娶老婆就係個人嘅事，個比喻根本唔啱！
（設計圖片及對白）
網民轟九唔搭八
莊永燦尋日同幾名律師舉行咗個「齊來鬆綁」行動，認為依家政改好似一潭死水咁，希望搵到方法打開個死結。莊永燦發言時，話自己準備咗幾點反駁近日嘅社會議題，對於有市民就政改宣傳廣告提出司法覆核，佢話入稟嘅市民誤解咗提委會嘅角色，以及基本法第四十五條，用法庭禁制政府播廣告亦係錯誤。至於之前有人用中央揀老婆比喻依家嘅特首普選方案，佢就直言個比喻唔啱，仲反問，點可以用個人娶老婆比喻七百萬人選特首呢件大事。
佢呢個講法除咗反駁當日挑機嘅女茶客外，仲間接寸埋星爺嘅倒米引用噃。其實，網上都有好多市民反對呢種說法，有人話盲婚啞嫁嘅年代早已過去，唔明點解會咁樣攀比；有人更話，點解要將政改扯上個人情感、家庭呢？批評比喻九唔搭八。更有人將政改同強積金作比較，話兩種都係一個制度，但我哋唔會話「老公唔儲錢，所以要阿媽（強積金）幫手儲」……睇嚟，啲政界人士想深入淺出咁比喻政局時，真係要小心謹慎，亂噏當秘笈，只會攞嚟衰！
