教育局前政治助理楊哲安嘅太太楊張新悅尋日出席攝影活動，為自己嘅家庭照揭幕，育有三個囡囡嘅佢話呢張係佢同三個囡囡嘅第一張合照，笑言老公無藝術細胞，所以平日都係由佢揸機拍攝，自己甚少上鏡。佢話喺拍攝當日，三女正在出牙，不時啜嘴，好難得搵到張靚相，對於照片拍出溫馨效果，佢話：「其實嗰日幾乎裙甩褲甩，影時佢哋狂笑狂跳，影一陣我已經好攰。平日好少帶囡囡出嚟，影下呢啲相就ok。」

對於近日飛鵝山綁架案，楊張新悅唔擔心屋企人成為對象。

楊張新悅同三個囡囡嘅合照拍出溫馨效果。

外遊險走失大女

對於近日飛鵝山綁架案，問佢有冇擔心時，佢話：「唔會，我哋唔會係對象，屋企都無錢，唔好嚇我，搞到我好驚。我哋都好小心安全問題，公眾地方一定自己帶小朋友去洗手間。」不過，佢透露曾試過喺外地遺失大女，佢話：「嗰時大女兩歲，我哋喺外地一間動物園酒店，老公以為我拖住大女細女，我就以為佢拖住大女，知道唔見咗個女好驚，幾家人一齊搵，酒店知道後好好，幫手搵女，發現大女一個人喺度，酒店職員陪住大女四十五分鐘，大女完全無喊過，依家我會教佢哋如果唔見父母要點做，成日喺屋企做角色扮演，但有次老公扮壞人，嚇到中女（次女）喊。」周日就係母親節，佢最希望收到老公同大女、二女合作做一個早午餐畀佢做母親節禮物。

第一手消息請下載on.cc東網iPhone/iPad/Android/Windows Phone Apps