話說食物及衞生局局長高永文早前落區宣傳政改，期間同一名反對政改嘅阿伯激辯，然後拂袖而去，令外界對佢一向溫文嘅形象改觀。高永文尋日接受網台訪問時自爆，其實佢喺附近兜咗個圈，又返轉頭去搵嗰位阿伯，諗住同番佢握手言歡，點知對方送咗個大檸檬佢食，唔騷佢喎。

劉慧卿（右）讚高永文夠膽上佢節目講政改，而且講嘢好真誠。

高永文再次為自己失儀解畫，話因為對方唔理解佢同小朋友嘅對話，而且言語間侮辱其他人，所以佢以嚴厲啲嘅方式爭取講嘢機會。佢又自辯好識同小朋友相處，好似前幾日，佢就去過幼稚園同小朋友講解觀鳥。雖然長者唔領局長情，但主持人白鴿黨主席劉慧卿就大讚佢夠膽上節目講政改，而且講嘢好真誠。高永文得到卿姐稱讚，應該可以笑番喇！

第一手消息請下載on.cc東網iPhone/iPad/Android/Windows Phone Apps