政壇：鴿黨激進派 靠拖等運到
依家嘅白鴿黨由激進勢力同一班「乳鴿」把持，除咗力撐該黨有「AV仁」之稱嘅立法會議員何俊仁辭職發動公投外，仲決定唔理民意，都要企硬反對政改方案，引起黨內溫和派不滿，計劃喺該黨黨員大會反擊，提出動議要求該黨立法會議員要根據民意對政改方案投票。原本該黨會喺黨員大會討論AV仁辭職公投，但辭職公投分分鐘胎死腹中，激進派就諗住乘勢拖延召開黨員大會，等溫和派冇機會翻身。
白鴿黨原本計劃喺今個月底開黨員大會，畀黨員就AV仁辭職公投表態，不過依家原本力撐辭職公投嘅「雙學」都甩底，學聯就因為各成員院校紛紛退出而自身難保，學民思潮只係掟二十萬元支持，但已講到出面唔會參與，泛民其他政團亦唔見得瞓身支持，加上黨內溫和派早已表明堅決反對AV仁辭職發動公投，所以辭職公投好大可能收檔。
肥仔明：唔使諗住走得甩
不過，包括「肥仔明」李華明、狄志遠在內嘅溫和派，就仍然希望可以盡快開黨員大會，藉此推翻激進派唔理民意，都要否決政改嘅決定。但喺激進派把持嘅中委會，就遲遲未公布幾時開黨員大會，似乎打算拖得就拖。白鴿黨主席劉慧卿尋日被問到幾時開大會時，都掟番個波畀中委會，話要等中委會下周決定喎。
已經去信該黨要求盡快召開黨員大會嘅肥仔明，就對中委會遲遲未公布幾時開會大表不滿，批評佢哋搞到反對辭職公投同激進派對政改態度嘅人喺度乾着急。肥仔明仲話，白鴿黨有機制，一定要喺政改方案表決前開黨員大會聽黨員意見，所以唔使諗住走得甩咁話。
