黃台之瓜,何堪再摘。激進組織粗暴趕客,搞到旅遊業得番半條命,偏偏呢個時候再爆出辱客醜聞,更係雪上加霜,醫番都嘥藥費。

話說一對來自廣州嘅夫婦帶同女兒參加三日兩夜香港觀光團,投訴被導遊強迫購買五、六千元珠寶,仲威脅如果不從,冇得繼續行程,亦冇酒店住,雙方爭執之下,有人拍甩旅客手機,最終鬧上差館。咁都未止吖,一名北京旅客前日下午喺旺角參茸行消費近八千元,聲稱店方將部分貨品標高幾倍價錢,事後要求退款被拒,要向消委會求助。

講真,香港由「好客之都」淪為「趕客之都」,早就臭名遠揚,再加埋「劏客之都」,仲有人敢嚟咩。最好笑嘅係,面對嚴峻形勢,高官一味玩數字遊戲,強調五一假期首日入境旅客比舊年同期增加兩成二喎,其實係人都知,旅行團同過夜客至係消費主力,業界估計今年五一內地訪港團數目下跌一成,酒店業界亦反映訂房情況遠遜去年。即係話,當局口中嘅所謂入境旅客增加,大部分可能係嚟香港轉機又或者即日來回嘅咋。

事實勝於雄辯,以往遊人如織嘅尖沙咀、銅鑼灣等旺區,連日來水盡鵝飛,藥房同金舖店員幾乎仲多過客人。有藥房東主形容,生意仲差過沙士時期,有金舖負責人仲話要蝕住做添,問你怕未。

業界人士形容旅遊業步入寒冬,其實計太一叮話齋,點止寒冬咁簡單,隨時進入「冰河期」添吖。「一簽多行」改為「一周一行」,唔少內地客感到被歧視,對香港已經冇乜好感,再加上內地近日宣布下調化妝品、服裝等進口貨品稅率,以及喺各口岸增設入境免稅店,內地客更冇必要山長水遠嚟香港受氣。所以話,本港旅遊業衰開有條路,家陣只不過啱啱開始咋。

真係諗極都唔明,激進分子「驅蝗」、「鳩嗚」,激化中港矛盾,背後有複雜嘅政治原因,港府拆唔掂唔出奇,但連規管旅遊業都束手無策,咁就真係令人莫名其妙喇。其實,取締零負團費、杜絕強迫購物、打擊黑店宰客,唔係咁難啫,只要加強巡查,從嚴執法,就可以有效杜絕劏客亂象,點解拖到依家都搞唔掂?

點講都好喇,香港四大經濟支柱冧嘅冧,縮嘅縮,旅遊業本來仲撐得住,家陣搞到搖搖欲墜,再咁落去,香港想唔玩完都幾難,叮!

第一手消息請下載on.cc東網iPhone/iPad/Android/Windows Phone Apps