政壇：AV仁任性辭職撕裂白鴿
政改大事，容不得任性、剛愎！民主黨（白鴿黨）喺政改立場上好激，該黨「超級議員」何俊仁（AV仁）今年一月更提出辭職，引發變相公投，當時已經嚇驚唔少人，原來佢事前並冇喺黨內討論過，完全係自把自為嘅決定，結果當然搞到黨內有唔少反對聲音，而黨員之間更就有關問題針鋒相對。
AV仁尋日接受電視台訪問時，講到辭職嘅問題，佢承認，今次辭職風波凸顯黨內分歧，不過，佢表現得好似冇乜大不了咁，或者一眾白鴿同床異夢多時，習慣咗各行各路啩。
但係，近日最先游說泛民中人辭職嘅學民思潮褪軚，同學聯突然話唔參與辭職公投，呢個決定令AV仁嘅辭職騷好似獨腳戲咁，既達唔到公投原意，又加劇白鴿黨同泛民之間嘅分裂，更分分鐘衰收尾添。當事人AV仁跌落地揦拃沙，話自己只係將議席交出嚟促成公投啫。聽落同學民思潮掟二十萬元畀白鴿黨搞辭職公投就想了咗件事一樣，大家都姿態十足，但遮唔住龜縮嘅真面目囉。
