慎言,知易行難。工聯會立法會議員王國興(阿王)上周日喺直播節目中,被學民思潮發言人黎汶洛質疑出賣工人權益後,隨即按捺不住兩度回敬對方「收皮啦!」結果畀人質疑佢講粗口,泛民主派更咬住唔放。話口未完,另一工會代表、佔領行動期間喺金鐘佔領區擔任糾察長嘅工黨成員郭紹傑,就喺社交網站上被揭用粗口「你老X,仲打機!唔瞓!」鬧阿仔,呢句貨真價實嘅粗口惹來議論紛紛,而爭普選爸爸粗口教仔嘅影響更壞呀,唔知泛民會唔會出動要求郭紹傑公開道歉嘞?

(設計圖片及對白)

郭紹傑尋晚凌晨兩點幾鐘,喺社交網站上載咗一張兒子打機嘅相,寫咗上述貼文,事後佢補飛話,仔女係佢嘅摯愛,仲自爆「自作孽」送遊戲機畀仔女,啲朋友雖然溫和勸佢「同個仔溝通係要有耐性」,但粗口鬧仔真係令人側目o架。

佢放得個仔打機嘅相上網,大可以直接叫個仔唔好再打機,點知佢來句網上粗口,做法真係令人奇怪。郭紹傑去年積極參與佔領行動,壹傳媒集團前主席黎智英被人淋屎掟豬雜時,佢亦有份制服涉案人士,事後被質疑「扮傷呃假去佔中」,因為佢去年九月以跌斷鎖骨為由申領工傷假,同時日日現身佔鐘區,其後又被發現喺立法會打邊爐及於佔領區明火打邊爐,依家搞到粗口鬧仔,唔通佢掛住佔領,疏於同個仔溝通?

第一手消息請下載on.cc東網iPhone/iPad/Android/Windows Phone Apps