政壇：斯諾登案律師為愛留港
律政司一次過有多達四名政府律師獲委任為資深大律師（SC），喺五大分科中人數最少嘅國際法律科，今年仲首次有成員榮升SC，佢就係有份處理轟動全球嘅斯諾登案嘅副國際法律專員（司法互助）華偉思（Wayne）。
譚耀豪（左起）、梁卓然、許紹鼎及華偉思同獲委任為資深大律師。
Wayne接受我哋訪問時透露，佢係新西蘭人，喺當地大學讀法律，但中途放棄學業，越洋來港做咗三年督察，之後先返家鄉完成法律學士課程。問佢點解最後又離鄉別井，重返香港加入前律政署做政府律師？佢話係為咗個「情」字。原來佢首度來港時遇到意中人，畢業後諗清諗楚，都係決定移居香港同愛人長相廝守，認真浪漫。但問佢喺斯諾登案中嘅角色，佢就話乜都唔講得喎。其餘三名榮升SC嘅政府律師有副刑事檢控專員譚耀豪、梁卓然同高級助理刑事檢控專員許紹鼎。
