政壇：鄧忍光官字兩個口
俗語話真理愈辯愈明，但歪理就可能愈講愈離譜。尋日大專辯論賽總決賽舉行，廣播處長鄧忍光都有出席，並同學生分享辯論經驗，點知佢嘅經驗就係大數立法會同傳媒，佢話，喺立法會發言好受阻，議員唔畀機會佢講嘢，轉頭同記者講，但冇記者會畀佢講晒想講嘅嘢。指摘人哋之後，鄧忍光卻唔肯答記者提問，一支箭就快閃咗。究竟係記者唔畀佢講？定係佢唔講呢？難怪人哋話官字兩個口！
（設計圖片）
尋日嘅總決賽係由嶺南大學及理工大學就辯題「香港本土意識提升有利社會發展」對壘，辯題觸及本土議題，原本已經惹火，點知鄧忍光又喺火上加油。自言公務員出身嘅鄧忍光話，佢出席立法會會議同面對傳媒時先用得上辯論技巧，點解？佢先呻立法會會議嘅發言時間得四分鐘，「議員會用三分五十九秒（發言），我得番一秒，永遠都冇機會o架」，要闡釋觀點、政策「應該出去同記者講」，「但唔好諗住講晒，因為你永遠都唔會講得晒」，仲指控「從來冇一個記者係畀機會你講晒所有嘢」，若一個論點用詞清晰，咬字準確，已經好成功。
頒獎後「快閃」離場
諷刺嘅係，呢頭數完人，頒獎之後，鄧忍光就懶理記者提問，一秒都唔肯留畀記者，喺職員陪同下直奔去座駕「快閃」。究竟邊個唔畀機會邊個呢？
講番場辯論賽，最後由反方嘅理工大學勝出奪冠，嶺南大學則屈居亞軍。
本土議題咁惹火，同退聯支持者理念都有唔少共通之處，啱啱成功退出學聯嘅理大被安排代表反方都出奇制勝，認真能屈能伸。不過，辯論還辯論，有份擔任評判嘅高院原訟庭暫委法官潘兆童（潘官）同監警會主席郭琳廣都不約而同告誡學生，千祈唔好同阿媽辯論呀！
