教科書年年加價 教育局年年死撐

呢嗱，教育局尋日公布新學年課本適用書目表，其中實體教科書平均加價百分之三點五，個別小學教科書加幅近百分之五；電子課本亦唔執輸，平均加百分之三。整體上，教科書加幅略高於實際通脹數字，教育局一味死撐，強調過去幾年推行課本「五年不改版」，以及課本、教材分拆訂價等政策，教科書價格升幅大致貼近或低於通脹喎。

嗱，呢啲咪就係自我安慰囉。冇錯，表面睇教科書加幅唔算太大，問題係年年加價，條數認真襟計。有人計過數，家陣中學課本開支平均佔基層家庭三成至四成八，對於唔少基層家庭嚟講，開學買書仲慘過過年關。再講吖，出版商各適其適，教科書售價間間唔同，同一個科目教科書，差價分分鐘高達八成，問你點頂！

至於限制改版同分拆訂價咯喎，更加係得啖笑。好似舊年咁，高中教科書不改版期限結束，出版商係又改唔係又改，搞到售價不斷上漲。消委會抽查市面多套高中教科書，發現真正需要改版嘅不足一成。講到尾，出版商為改版而改版，咪又係搵藉口加價。至於所謂分拆教材，你有張良計，佢有過牆梯，書商將成本轉嫁畀家長，咪又係嘥氣。本來呢，推行電子書不失為可行辦法，弊在當局拖拖拉拉，電子書仲喺起步階段，有排都未普及。即係話，無論書商點樣獅子開大口，家長除咗任人宰割，淪為人肉提款機之外，根本別無選擇。

話時話，要解決教科書年年加價嘅問題，唔係冇辦法，問題係教育官僚有冇決心同承擔啫。正如有人話齋，只要倣效內地同日本，由政府統籌出版教科書，統一定價，書商自然唔可以再予取予求。可惜講者自講，港府一於少理，以所謂自由市場為藉口推卸責任，闊佬懶理。你知啦，書商在商言商，唯利是圖，梗係飛擒大咬，加得就加嘅喇。

點講都好，解決教科書問題，減輕家長負擔，教育局責無旁貸。咪話太一叮唔提醒吖，家陣香港七國咁亂，市民怨聲載道，當局繼續坐視書商將學生當搖錢樹，遲早激起民怨，到時教育局局長吳克儉就真係唔得掂嘞，叮！