城中鏡：右拍拍：記者傍身啟山唔驚標參
富商千金被綁架成為全城熱焦點，身為港協暨奧委會會長霍震霆嘅二仔霍啟山尋日出席活動時，對綁架事件似乎唔多擔心，事關霍家好低調，所以冇諗過加強保安問題，仲講笑話有咁多記者喺度，佢去邊都有人知道喎。不過，啟山經常中港兩邊走，真係唔使請保鏢？佢就話唔使請，自己亦唔識功夫，但足球腳法都幾好，仲趁機宣傳嚟緊香港青年足球總會有個十八區足球比賽，叫大家支持吓喎。
霍啟山話霍家好低調，唔使請保鏢。
講到近況，啟山話依家花好多時間喺南沙打理生意，希望生意愈來愈好之餘，亦希望多啲時間返港陪家人。佢透露媽咪朱玲玲創辦嘅慧妍雅集會喺母親節搞個派對，佢會陪媽咪一齊去，呢份就係最好嘅母親節禮物，事關最寶貴嘅禮物就係時間，想喺呢啲日子多陪家人。
提到舊愛章子怡將與汪峰結婚，問啟山會唔會祝福對方，啟山話：「最近無咩同佢聯絡，如果係真一定會祝福。」
