城中鏡：城中名流玩轉扮靚派對
近期一連串反水貨客行動同內地收緊一簽多行變成一周一行政策，已對香港零售業造成打擊，加上日前內地計劃下月降低消費品關稅，令港零售業雪上加霜，化妝品行業更首當其衝。不過，卓悅集團美容部營運總監Erica鄧肇殷就冇有怕，事關旗下公司未曾將內地客視為主要客源，向來始終以本地市場為先，所以未來會引入多啲概念新穎嘅產品，幫城中姊妹們扮靚靚喎。
鄧肇殷（右）對設計師Marco（左）嘅晚禮服作品十分滿意。
藍國慶（右）同莊哲猛（左）抽空出席支持身兼善德基金永遠名譽會長嘅葉鍾佩雲。
葉俊亨（右）同葉鍾佩雲兩公婆同心創業成功，寫下傳奇。
扮靚被唔少女士視為終身事業，難怪城中美容集團生意咁旺。賣法國化妝品起家嘅卓悅集團早前舉行二十五周年晚宴，城中名流齊玩轉派對。打扮似花仙子嘅卓悅副主席葉鍾佩雲致辭時話，回想當年創業時只得一間五十呎舖頭，幸好有丈夫兼卓悅主席葉俊亨嘅膽識才幹，加上佢嘅扮靚精神，夫妻同心努力奮鬥先至有今日。
葉太女兒兼仁濟醫院總理Erica都打扮靚靚現身，佢話未來會投放更多時間喺仁濟醫院工作，咁啱因為公司總部即將由土瓜灣搬到荃灣，以後就唔使驚好似以前咁趕到位於荃灣嘅仁濟開會。出席晚宴嘅名人仲有「玩具大王」蔡志明太太蔡李惠莉、善德基金會主席董吳玲玲、常務副主席藍國慶、總理莊哲猛及兼任永遠名譽會長嘅仁濟醫院前主席蘇陳偉香。
蘇陳偉香話，每月寄一百萬元支票捐畀仁濟醫院並累計捐咗一千萬嘅神秘善長，四月份繼續寄來了一百萬元支票，佢希望呢位善長繼續捐，最好再捐多一千萬喎。究竟呢位神秘善長係邊個呢？
