政壇：搞搞政：冇份孖高官落區 田少說話酸溜溜
二○一七年特首普選方案上周三公布後，政府高官隨即落區推銷政改，本周一開始一連多日，分早上、中午同傍晚放工三個時段，輪流落區同市民接觸，班高官大多數時間都有建仔、工聯會等建制政黨代表陪同，唯獨唔見建制派「壞孩子」富貴黨代表嘅身影，呢個係繼政府司局長前年曾集體杯葛富貴黨二十周年黨慶後，另一明顯政治動作，令人懷疑因為該黨過去嘅言行同往績，搞到政府同建制派都要同佢哋保持距離。
早前被搣全國政協委員嘅富貴黨榮譽主席田北俊，尋日出席電台節目時回應落區一事時認真酸溜溜，口說官員落區係好事，但同時又話睇到陪同官員落區嘅人士，穿着印上所屬政黨或個人名字嘅衣服，認為似係推銷自己多啲。
其後佢進一步質疑，有關人士係推銷政改，定係令自己嘅區選工作提早起步，又直接承認政府冇就落區嘅事直接搵該黨，而該黨亦未收過邀請或通知。話時話，政府連落區大龍鳳都無借助富貴黨地區力量，或事先打招呼，雙方關係有幾好，都唔使多講喇！
另一方面，富貴黨二十多人早前高調進入中聯辦，同中聯辦領導層會面討論政改，政治意味濃厚。有建制派中人分析，潛台詞係有關方面仍擔心富貴黨五票會走票，要提早出招再次箍緊，之不過，據聞田北俊當時剛好不在港，缺席呢次重要會面。究竟田北俊怕尷尬唔現身，定係有其他原因，只有佢自己至知。
