政壇：至叻星：東北發展路漫漫 波波難拆彈

城規會經過兩日閉門審議，最終原封不動通過備受爭議嘅新界東北新發展區計劃。城規會話已考慮受影響人士意見，但認為發展粉嶺北同古洞北兩個新市鎮，符合社會整體利益。面對五萬多個反對意見，城規會否認係橡皮圖章，稱明白同理解受影響人士關注及憂慮，因此強烈建議政府妥善處理佢哋嘅關注同訴求，適時提供最佳協助。雖然政府過咗第一關，但係發展局局長「波波」陳茂波唔好開心得太早，因為受影響嘅村民揚言不排除會司法覆核城規會嘅決定，相信佢都有排拆彈。