政壇：蔣麗芸被勸睇《心經》拉布降火
近日立法會就財政預算案上演嘅「拉布」戲碼有排都未落畫，唔少建制派議員不滿「拉布」之餘，為免流會又要被迫輪更陪坐，都咪話唔激氣。議員Ann蔣麗芸前晚趁出席工聯會活動時，就拉住立法會勞工界前議員潘佩璆猛呻，話「拉布」搞到佢精神受創傷，向「前輩」討教下火心得。本身係精神科專科醫生嘅潘佩璆笑言，想下火唔使食藥嘅，拜讀佛教巨典《心經》就得喇！
潘佩璆（左）建議蔣麗芸睇《心經》下火。
潘佩璆自從一二年卸任勞工界議員後，日前再卸任工聯會副會長，日子應該清閒得多。現職聯合醫院精神科顧問醫生嘅潘佩璆更透露，今年十一月就夠鐘退休嘞，但佢同時向醫管局遞表申請重返崗位，打算做多兩年先真正引退。
另外潘佩璆年前因大腸有事要接受治療，既然身體好番晒，退休後有冇意思重返立法會呢？佢似乎怕咗依家嘅議會生態，笑言為咗身心健康，呢啲嘢都係咪搞。咁又係，依家立法會七國咁亂，返去咁激心咪盞能醫不自醫。
