政壇：格羅斯借伯南克寸舊東家

聯儲局前主席伯南克卸任一年有多，最近開始積極搵真銀，啱啱去咗全球最大債券基金公司太平洋投資管理（Pimco）做高級顧問，係佢呢兩個星期內第二份顧問工，不過就即刻被「債券大王」格羅斯寸，話Pimco明顯想借伯南克個大名做公關騷，係一個大好消息嚟，句句「有骨」。

但話說另一位前聯儲局主席格林斯潘，亦曾喺○七年做過Pimco顧問，當時請佢嘅就係格羅斯，仲喺之後一年大讚格老為公司「賺咗同慳咗數以十億計美元」，因為佢畀出啲寶貴嘅當局政策指引同埋對通脹嘅睇法。

但格羅斯又話，畀着佢依家就唔會請伯南克做顧問，寧可只睇佢每個星期嘅網誌同Tweets。點解反應咁唔同？眾所周知，格羅斯係Pimco創辦人，但佢上年同其他同事搞到極唔愉快，仲喺被炒之前一刻跳槽去駿利（Janus），依家聲勢同以前無得比，葡萄大概有啲酸。