政壇：張華峰自爆想添丁
因為近期股市爆升而豬籠入水嘅立法會金融服務界議員「肥老闆」張華峰，聽日就六十三歲牛一。尋日幾位黨友提早幫佢慶祝，祝佢繼續喺股壇有斬獲。呢個只係黨友嘅祝福，但係肥老闆另有想法，每個人都有一個生日願望，但佢就有四個咁多，除咗想減肥二十磅、恒指衝上三萬五千點同通過政改方案外，最爆就係想添丁。一次過咁貪心許咁多願望，唔知邊樣先可以成真呢？
嫌肥望減20磅
肥老闆正日生日要留番同老婆慶祝，所以尋日幾位黨友包括商界林健鋒、工程界盧偉國同九龍西直選議員梁美芬等，就提早幫佢慶生。可能肥老闆實在太興奮，吹蠟燭時一口氣許下四大願望。
首先係減肥二十磅，其實佢都唔係第一次話減磅，當年佢當選立法會議員時都話過減磅，但結果繼續大啖食，今次分分鐘都係無咗件事。
第二個願望就係添丁，雖然肥老闆現已有一仔三女，但佢話想追多個喎。被問到係咪「有心有力」時，佢就突然挺起胸膛大喝一聲「哼！」以證明自己雄風不減。至於通過政改方案，睇怕實現呢個願望都有啲危，事關政府軟硬兼施、費盡唇舌咁勸泛民主派嘅議員「袋住先」，但係班泛民議員仍然不為所動，所以就連肥老闆嘅黨友「大舊石」石禮謙，亦即時「潤」佢一句：「嘩，你生日都掛住政改，政府一定好感動！」
反而恒指衝上三萬五千點嘅願望，就應該有少少機會實現喇！肥老闆分析話，如果政改方案被否決，應該有三日跌市，但之後一定會反彈，叫大家預備定彈藥入貨喎。
