內地下調消費稅 香港旅業雪上霜
最近港股進入大時代，長升長有，好多股民大有斬獲，個個賺到笑。不過咁，隨着內地拍板調整消費品進出口政策，下調消費稅之餘，仲會增設免稅店，本港零售業首當其衝，相關股份尋日應聲急跌，前景認真不妙。
係咁嘅，鑑於國人對國外日用品需求愈來愈大，中央決定結合稅制改革，下調化妝品、服裝等大眾消費品嘅稅率，仲會喺各口岸增設或恢復入境免稅店，方便國人購買外國貨品，同時計劃為境外旅客提供退稅服務。
係人都知，外國貨品進入內地市場會被徵收進出口關稅及消費稅，好似化妝品咁吖，消費稅高達百分之三十，都咪話唔誇張。反觀香港係免稅港，所以一直係旅客嘅購物天堂。不過時移勢易，隨着內地愈來愈開放，購物愈來愈方便，香港嘅優勢已經所餘無幾，加上激進組織不斷趕客，令旅遊及零售業進入寒冬。有內地旅客就講得啱嘞，既然香港人唔歡迎佢哋，喺內地又可以買到平貨，仲使乜山長水遠嚟香港受氣喎。
冇計喇，近年香港行衰運，有人不斷搞搞震，自己倒自己米，唔係「驅蝗」，就係「光復」，再唔係就「鳩嗚」，係人都怕怕喇。再講吖，中港矛盾愈演愈烈，「一簽多行」又改為「一周一行」，內地旅客感到被歧視，對香港更加冇好感。正如財經專家話齋，本港消費市道本來已出現下滑，驅蝗行動令內地高端旅客蟬過別枝，轉到其他國家旅遊，日後內地再調低消費稅，香港零售及旅遊業都幾難有運行。
嗱，數字唔會講大話，去年香港零售業銷售額出現十幾年來首次負增長，已經係一個警號，而農曆新年後訪港旅客一樣跌跌不休，三月份按年下跌百分之八點七，復活節及清明節長假內地客減少一成四，連東南亞及歐美旅客都下跌百分之六。業界預料五一長假都唔慌好得去邊，就算旅發局加強宣傳，業界推出連串購物優惠救亡，一樣未可樂觀。
一榮俱榮，一損俱損，零售及旅遊業係基層勞工密集嘅行業，一旦不景氣持續，隨時出現倒閉及裁員潮。所以話，激進組織唯恐天下不亂，係都要搞死香港，都唔知究竟有乜目的。正如有人話齋，回歸時香港經濟總量佔全國GDP近兩成，家陣得番百分之三咁大把，咁都仲要繼續趕客，結果只會玩死自己咋，叮！
