政壇：搞搞政：新民黨三喜臨門為葉劉驅黑氣？
自大年初二喺沙田車公廟畀麒麟撞飛後，新民黨立法會議員葉劉淑儀自此是非多籮籮，佢日前一篇文章被指歧視菲傭更加搞到滿城風雨，最終要道歉沙冧先收到科。不幸中嘅大幸係，該黨下月輪住嫁女又娶新抱，包括南區區議員陳家珮、屯門區議員蘇嘉雯同葵青區議員徐曉杰，簡直「三喜臨門」，唔知呢三頭親事能否幫葉劉沖一沖喜，驅散黑氣呢？
下月最早「封盤」嘅係徐曉杰，佢嘅地頭喺青衣，但準太太係沙田公民力量成員，能夠跨區認識兼結婚，全靠兩黨舊年初結盟，二人先開始認識。似乎兩黨「結婚」唔單止係選舉策略，仲造就唔少親事。舊年先當選南區區議員嘅陳家珮亦計劃下月底同政圈外男友拉埋天窗，佢自言年紀唔細，婚後會不設防造人添！佢仲話葉劉向佢傳授「御夫術」，包括喺婚禮上唔好搶晒啲嘢嚟講，要留番啲畀老公講喎。唔通呢啲係葉劉嘅經驗之談？
蘇嘉雯與黨友結婚
至於蘇嘉雯都係同黨友結婚，但佢透露由於準老公本身同陳家珮相熟，當二人宣布下月婚訊嗰陣，有街坊甚至同事都以為陳家珮同蘇嘉雯準老公先係一對，搞出個大頭佛。蘇嘉雯透露，二人係喺該黨年前舉辦嘅國情研習班上認識，黨就係佢哋嘅紅娘喇！
記得葉劉被麒麟撞飛後，堪輿學家麥玲玲已批過葉劉喺羊年會多阻滯同麻煩，更加係「全年黑過鬼」，結果真係應晒衰是非口舌。依家一連三頭親事真係夾都冇咁啱時間，相信呢股喜事能量都幾巨大，或者可以沖走葉劉嘅黑氣，咁葉劉係咪要入定封大人情呢？
