政壇：馬雲認命話老竇改啱名

阿里喺北京開員工大會，會上馬雲話阿爸幫佢改呢個名，有「馬」又有「雲」，即係「天天在空中，天天在奔跑」，話自己忙到日日飛越唔同城市，佢認命。無端向員工講呢啲？嗱，下文嚟喇。佢跟住就話啲員工，你哋都一樣，邊個叫你入咗阿里，跟咗個咁嘅人，你嚟咗，就認命，既然認命就好去努力。See！

馬雲話員工跟着佢就要認命，就好去努力。（資料圖片）

馬雲又話阿里擴張過快，依家三萬幾員工乜都夠晒，所以今年一個Headcount都唔會加，走一個先請番一個。至於有啲公司多到八萬人，佢話願上帝祝福呢啲公司喎。莫非講緊京東？

佢又叫人千祈咪信「初創公司啲人包勁」，事關頂尖高手都唔會入初創公司，初創入面一般只有一、兩個人得，其他絕大部分係垃圾。無錯，馬雲真係用「垃圾」呢個字眼。佢嘅結論係：阿里唔挖角，寧可自己培訓。