政壇：泛民阻開位查科技罪行
喺泛民主派議員反對下，立法會人事編制小組委員會尋日否決警方為加強打擊科技罪案，擬增設一個總警司職位嘅建議。泛民質疑新職位係用作網絡政治監控，而唔係打擊商業罪案。建制派就批評泛民純粹針對警隊，變相助長科技罪行發生。雖然開位建議畀小組以九票贊成、十四票反對否決咗，但政府稍後仲可以直接向立法會財務委員會「翻案」申請開位。
莫乃光批警方「親疏有別」。
警方建議喺刑事部開設一個總警司常額職位，領導喺早前升格咗嘅網絡安全及科技罪案調查科，新職位每年開支大約二百二十八萬元。工黨議員李卓人質疑新職位唔係用喺調查商業罪案，而係好似政治小說《一九八四》咁，用新科技監控市民生活。
資訊科技界議員莫乃光批評，警方早前安排行政會議成員參觀警方網絡安全中心，但唔容許立法會議員參觀，係親疏有別，難令人信服。保安局官員就解釋，行會成員參觀時中心仲未開始運作，唔存在敏感資料，但中心投入運作後就必須保密，如非行動需要都唔會容許他人進入，否則若出現洩密，最大得益者將會係黑客同犯罪分子。
