政壇：李小加在公在私生成CEO命

尋日港交所開股東大會，呢排港交所股價好似坐火箭咁升，啲小股東梗係好滿意，罕有咁一條問題都冇問管理層。反而有媒體問小加總裁，揸住啲港交所獎授股份，會唔會趁股價咁高，沽貨套現？小加總裁又爆金句，話自己有足夠嘅錢可以花，再者佢屋企董事長有另一個人咁話！明晒，小加喺出面做大事搞互聯互通，兩地股市變化翻天覆地，返到屋企，都係聽老婆話。小加平日都係Family Man，如果唔係出差，平時放假都鍾意陪家人呢度去嗰度去，每逢有長假，都會到外地旅行。

今年港交所股東會仲有一個特別地方，係出席嘅小股東人數比往年多，有成二百幾人，逼爆會場，仲個個蓮子蓉咁面口。有位婆婆小股東，講開港交所股票，就眉飛色舞，話自己百幾蚊買入，早排見二百元就沽、之後一路升一路沽，依家剩番一千股，死都攬住唔放。小股東個個賺到笑，股東會散場後，攞紙包飲品一樣眼明手快，其實一手港交所閒閒哋都成三萬元，包紙包飲品邊度係錢呢可。