政壇：AV仁玩辭職公投勢甩轆
白鴿黨嘅立法會「超級議員」「AV仁」何俊仁，早前提出透過辭職引發全港「變相公投」，原意係想喺政改方案否決後重新團結泛民主派政團同其他佔中支持者，聚焦攻擊中央同特區政府以圖挽回聲勢，但結果卻反而加劇咗泛民內部嘅分裂同不信任。其中香港專上學生聯會（學聯）同學民思潮，最近雙雙表明唔會加入公投委員會，有白鴿黨人就以「甩咗兩個轆」嚟形容，睇嚟AV仁辭職公投單嘢，遲早都係車毀人亡收場喇！
單雞坦言「增運動難度」
其實AV仁係咪真係會辭職都係未知之數，事關佢當日開記者會向外宣布後，隨即惹起黨內嘅反彈，而佢辭職嘅建議仲要得到黨員大會通過先得，而黨內一班溫和派，亦正喺度游說其他黨員反對辭職嘅建議添！
當日傍住AV仁出嚟開記招嘅黨友兼立法會議員「單雞」單仲偕尋日就坦言，學民前日表態拒絕力撐公投，增加咗整個運動嘅難度，尤其係白鴿黨內本來已經有唔少人反對AV仁辭職，依家反對聲音肯定會更大。佢又話公投運動最初係有七個團體參加，依家學民中途唔玩，學聯又面對外憂內患，即係甩剩五個轆。
白鴿要搵肥佬金主打救？
另一泛民中人更透露，辭職公投估計花費高達五百六十萬元，最初建議有兩個籌旗方案，其一係七個團體每個一次過夾八十萬元，其二係每個團體先畀二十萬元，之後再喺七一遊行等大型活動中集體籌款；依家班學民仔擺低二十萬然後就話唔玩，好似啲情侶分手畀「掟煲費」咁，非常不負責任，令佢哋要重新計過晒條數。唔知白鴿黨最後係咪又會搵番「金主」打救，叫壹傳媒集團前主席黎智英找埋條數呢？
