停牌司機狂飆車 都市炸彈不勝防

嗱，日前發生嘅的士司機瘋狂駕駛事件，咪就係一個明顯嘅安全漏洞囉。話說一名被罰停牌嘅的士司機，居然繼續載客，當駕車至青葵公路時，因為超速被警方嘅雷射槍「射中」截查，點知有人心虛，唔停車不特止，仲瘋狂踩油，狂飆三公里，而且衝入車罅圖突圍，結果造成九車串燒相撞，五名乘客受傷，直情好似拍荷里活電影咁，問你怕未。

咪以為今次係個別事件吖，一直以來，車行出租的士都唔會檢查司機駕駛執照，換言之，只要交得起車租，話之你停牌又好，無牌又好，釘牌都好，車行一樣照租不誤，擺明係一大漏洞喇。雖然話車行打開門做生意啫，但都唔能夠來者不拒，檢查駕駛執照只係舉手之勞，咁都唔做，咪就係因為運輸署冇呢方面嘅規管同要求囉。

一直以來，運輸署對的士車行嘅監管似有還無，莫講話對車行點樣出租的士不聞不問，即使有車行或車主違反《勞工法例》，冇為前線的士司機購買保險，運輸署一樣闊佬懶理。仲有呀，的士營銷市場被壟斷多時，運輸署又冇主動引入競爭，搞到的士質素愈來愈差，有前線司機形容為「豆腐渣的士」，一啲都冇誇張。

話時話，的士安全唔止關乎的士司機本身，仲影響乘客及道路使用者安全，運輸署袖手旁觀，簡直係靠害。呢，職業司機停牌期間駕駛都唔係第一次發生嘅喇，次次都係警方截查先至揭發，到底運輸署幾時至肯堵塞漏洞吖？

講開的士，唔能夠唔提造成三死九傷嘅慈雲山車房巨爆慘劇，一樣係當局冇監冇管所導致。原來現時全港二千多間車房，只有二十九間獲機電署發牌准許更換石油氣車輛氣缸及喉管，而發生爆炸嘅車房正正係無牌嘅。大家睇到喇，運輸署一味要求柴油的士轉為石油氣的士，但合資格車房少之又少，加上機電署監管粗疏，搞到無牌車房遍地開花，唔出事至奇吖。

福無重至，禍不單行。咪話太一叮唔提醒，交通安全事關人命，絕對唔能夠掉以輕心，當局繼續關人個關，遲早又爆大鑊嘅咋，叮！