城中鏡：下拍拍：紅酒節爛地騷 楊全盛蝕凸
早前喺中環海旁舉行嘅香港數碼生活嘉年華及添馬紅酒佳餚節，因連場大雨變成爛地，入場人次亦大減，部分商戶仲浸濕唔少貨物，結果主辦單位退回三成租金作補償，據聞成個活動冇得賺之餘仲要倒貼百幾萬元。
楊全盛講起紅酒佳餚節變爛地騷都好心噏，話明年未必會搞嘞。（資料圖片）
雖然嘉年華閉幕近半個月，但仍然餘波未了，皆因主辦單位仲有八萬元訂金未追番，認真禍不單行。
香港軟件行業協會會長楊全盛（Eric）大呻，單係場地費用就已近二百萬元，另外清潔費同雜費埋單亦近一百萬元，雖然政府有八十萬元資助，但連埋舖租，佢同另一名合夥人每人要夾幾十萬元先夠找數。唔單止咁，因為場地係屬於海濱事務委員會外判嘅私人公司，該公司認為主辦單位整污糟笪地，可能要喺訂金扣數，所以至今未能埋數，唔怪得佢話貼錢買難受喇，明年都未必再搞喎。
