城中鏡：高科技素食攻港 「營」人有口福
素食風氣喺香港已經盛行咗一段時間，唔少人都已經養成定期食素嘅生活習慣，但另一個問題又出現喇，就係素食食材唔夠多元化，食得耐難免覺得好單調。社企Green Monday日前就與超級市場合作，將多款有肉類質感及營養價值嘅高科技素食引進香港，素食者以後唔使淨係食普通蔬菜咁寡喇。不過，對於真正食「齋」嘅教徒嚟講，食植物肉類會否「齋口唔齋心」呢？
楊大偉（左）與徐德耀一齊試食植物肉丸。
項明生都支持高科技素食。
素食人氣網絡廚神素媽媽Christine即場示範點煮植物雞肉條。
講到市面上唔少齋舖一向有賣造型貌似肉類嘅素食，例如素叉燒等，Green Monday創辦人楊大偉（David）就話，今次呢啲由大豆及豌豆等製成的「植物肉丸」及「植物雞肉條」有所不同，市面上啲素肉好多都係外形似，但食落完全唔係嗰回事，相反植物肉類就真係同肉嘅質感及營養價值一樣，可以補充素食者平日吸收唔到嘅營養外，仲可以用嚟烹調各種菜式，夾喺麵包入面當三文治食都得，好方便。
本身有經營食肆嘅慈善機構雪豬基金會創辦人徐德耀就解釋，「食齋」同「食素」有別，食素可能只為健康，會食蛋或奶，而食齋就只食蔬菜及菌類等，雖然佢個人比較鍾意食真嘅素，但高科技素食對剛開始食素嘅人嚟講都可以話係多一種選擇。
項明生執衫捐尼泊爾
旅遊作家項明生亦有捧場，講起尼泊爾地震，佢話去年及十多年前到當地時都覺得當地人非常善良，即使今次發生天災都沒有搶劫等情況出現，人民質素好高，可惜佢哋通訊落後，離開之後就冇再聯繫啦，但佢知道當地目前需要募集大量衣服救援，佢回家後，即刻執咗兩大袋衣服捐去當地。
