政壇：搞搞政：學民大整蠱 推老鴿去死
俗語話，精人出口，笨人出手。泛民主派喺政改方案上一直玩嘢，民主黨更諗緊由一名超級區議員辭職，原來呢個方案最初係由學民思潮率先游說，依家白鴿黨落疊，但學民思潮尋日就話，唔會加入「公投委員會」，只會撥出二十萬元支持公投啫。
呢一招明跣白鴿黨之外，仲保留以後聲音多多、動作多多嘅權利，真係神又係佢，鬼又係佢，老於政壇嘅一眾老鴿會唔會覺得畀人「大整蠱」呢？
最近，泛民陣營開始商討辭職公投嘅細節，學民話只會撥二十萬元支持AV仁辭職公投，但唔會參與行動決策，又聲稱學生要同政黨保持一段距離喎。佢哋尋日發出嘅聲明，又多次強調學民支持白鴿黨派員辭職公投，但基於種種原因，例如泛民唔肯「拉布」等，令佢哋發現泛民議員喺路線上同學生有唔同取態，聲稱好容易有爭拗，再加上學民好唔同意公投備忘錄內一句「各組織有責任擱置泛民主派間的爭拗」，所以經過學民會員大會後，決定唔加入「公投委員會」。
講白啲，即係學民擔心同泛民坐同一條船後，就無得繼續鬧白鴿黨，所以咪唔想加入公投委員會囉！上次泛民五方平台開會預計各黨派最少需上繳八十萬元，先有足夠資金搞公投，依家始作俑者施捨啲錢，就拍拍屁股作壁上觀，其他泛民團體會唔會照辦煮碗，真係好難講喎。
