政壇：陳家強講股市「神燈」上身
股市進入大時代，大上大落，每日成交一度二千幾億，投資嘅、投機嘅都瞓晒身，真係全民皆股咁款。政府財金官員見到咁嘅形勢，都不時評論吓港股，希望小投資者小心，不過，繼財爺鬍鬚曾一時一樣之後，財經事務及庫務局局長陳家強（圖）尋日又講股市，畀人嘅印象依然係股市「神」燈，係神神哋嗰個神呀！
陳家強尋日話，今次升市有機會只係追落後，預料港股每日成交額高達二千億元係新常態喎。投資者聽呢幾句，係咪以為佢大肆唱好，甚至視之為入市訊號呀？如果係咁，咁就大件事喇，事關陳家強跟住又話，現時港股每日交投量高，股價亦好自然大幅波動，叫投資者要考慮自身承受風險喎。咦？呢句又唔同咗，係叫小股民小心喎，咁到底陳家強要講乜呢？與其發放錯誤訊息，其實官員叫市民小心投資就得啦，講多盞衰多口。
