政壇：公僕升遷有涉配偶選拔
升職加薪受好多環境因素影響，但私相授受就需要嚴正避嫌。由商務及經濟發展局前局長劉吳惠蘭任主席嘅公務員敍用委員會，發表咗二○一四年報，佢哋發現公僕隊伍裏面原來有啲升遷問題都好騎呢，譬如過去一年有兩項不同晉升選拔嘅工作中，選拔委員會嘅主席及一位委員，分別申報佢哋嘅配偶係該晉升選拔工作中嘅合資格候選人員，嘩，老公有份揀老婆升職？
委員會話，雖然以上兩人都喺選拔委員會討論他們配偶嘅晉升條件時避席，但似乎都有問題喎，因為佢哋有份睇同一升遷嘅其他候選人，而呢啲人員都係佢哋配偶嘅「競爭對手」，因此，上述情況其實存在潛在利益衝突，所以，委員會認為聘任當局更改有關晉升選拔委員會組合，「會是較妥善和審慎的安排」。
年報又披露委員會去年曾就四十八宗紀律個案提供意見，其中十三宗涉公務員最終遭免職，包括十二宗迫令退休及一宗革職個案，當中迫令退休個案創一○年以來新高；至於處以嚴厲譴責另加金錢懲罰的個案則有十八宗。
