香港地做業主最發,擁有唔少物業嘅港大專業進修學院都手執唔少「磚頭」,原來多得曾擔任藝術發展局前主席嘅港大專業進修學院校友會會長陳達文(Darwin)。佢二十年前擔任該學院校董會主席時,大膽建議將基金會所有現金買樓,不沾股票,眨眼二十年,物業勁升值。

唔炒樓嘅陳達文,幫港大專業進修學院投資物業有道,資產勁升值。

Darwin日前出席一個學院嘅成立儀式,講起買樓令學院致富,笑到見牙唔見眼。佢細訴當年大手筆入市,係深信香港地少人多,物業價值遲早飛升,眼見港大專業進修學院有大筆現金,於是力排眾議,唔買股票,全數押注買磚頭,連掃金鐘統一中心、海富中心及英皇道多幢物業。合共升值幾多倍?Darwin話無計過喎。

佢又話,辦培訓中心只能喺晚間開班賺取收入,唔划算,所以早年已諗到自置物業,避免捱貴租。雖然幫人炒樓未輸過,但Darwin自己就從來唔炒樓,為官三十多年,手上至今亦只有一層物業自住:「當年我做過屋宇地政署署長,為免被人話有利益衝突,所以唔炒賣物業。」只係間中幫仔女投資買樓,幸好通通升晒值。

第一手消息請下載on.cc東網iPhone/iPad/Android/Windows Phone Apps