平日高官出巡,有嘢同傳媒講及接受訪問,都係全靠外號「行街隊」嘅政府新聞處同事就地搭個俗稱「咪兜」嘅咪架,方便記者擺咪牌同錄音筆。不過,隨着香港愈來愈多電視台及網絡媒體,部分重要時刻更吸引中外傳媒採訪,「咪兜」經歷幾代變身都唔夠用,多出嘅咪牌經常要用牛皮膠紙加固,都咪話唔牙煙。據聞新聞處正研究再「擴建」咪兜,希望容納到更多媒體報道。

聽聞上一代政府新聞處創先河,自家設計流動咪兜方便記者採訪收音,經歷多年演變,由第一代嘅十個放咪位,加到十二個,直至現時十四個位都開始唔夠用。據知新聞處正研究加夠十六個位放咪,但亦要睇咪兜設計承唔承受到咁多咪,而官員講嘢時嘅視覺效果都要考慮,所以咪兜「擴建」之路仲好漫長。

另外,新聞處管理嘅「政府新聞網」facebook專頁日前因為上載為女同事餞行嘅相片而被網民「負評」,但有睇法認為有人鬧總好過冇人知,因為新聞網正正想同年輕人輕鬆交流,希望發放新聞稿之外,可以多啲軟性話題喎。

第一手消息請下載on.cc東網iPhone/iPad/Android/Windows Phone Apps