政壇：蔣麗芸點樹根選特首
政府已經公布咗一七年特首普選方案，有關政改嘅討論亦愈來愈熱鬧，立法會議員蔣麗芸（Ann）尋日接受電台訪問時講到佢嘅提名策略，被問到若果泛民嘅何俊仁參選，挑戰特首梁振英，阿Ann會點揀﹖佢即刻好大反應，話一定唔會提名AV仁，如果係咁嘅話，佢分分鐘呼籲黨友鍾樹根參選特首喎，雖然樹根好快回應話阿Ann擺佢上枱，但都話好多謝黨友賞識哦。
根據政府草擬嘅政改方案，「出閘」階段，每名提名委員會成員都可以逐一表決方式，以暗票形式最少提名兩位參選人。政府推出方案後，有人大讚咁樣有助溫和理性泛民主派人士順利「出閘」，但亦有人意見相反。講到過去一屆選舉有梁振英、AV仁等落場，大家會點揀呢？
樹根多謝黨友賞識
上屆特首選舉已經做緊選委嘅阿Ann話，佢一定唔會提名AV仁，或會呼籲樹根參選特首，以增加參選人數目，佢解釋，自己會以參選人能力作提名準則：「不會只選心儀，因為唔係揀老公！」如果提名階段有三個人畀佢揀，當然會揀兩個愛國愛港人士啦，但如果到時得兩個人畀佢揀，例如一個梁振英，一個係AV仁咁點呢？阿Ann話為咗唔想將手上一票焗畀AV仁，會即時建議黨友樹根參選特首，到時就會提名梁振英同樹根二人，唔會益咗AV仁喎。阿Ann咁講表面上係踩緊AV仁，但實際效果係連自己黨友都踩埋，唔知佢係咪口快快噏錯嘢呢？
無啦啦突然中箭嘅樹根，知悉阿Ann將佢同AV仁放喺同一個層次後，就話「咁即係擺我上枱啦」。但之後佢都叫大家唔使咁認真，又多謝黨友咁賞識佢喎。咁樹根會唔會真係參選特首？佢就話真係無呢個意向，因做特首唔簡單，唔止向一千二百人組成嘅提委會負責，仲要向全港市民負責喎。如果樹根真係參選特首，相信一定好精彩。
