遙控飛行無王管 橫禍隨時從天降

即係咁，隨着航拍愈來愈普遍，安全及私隱問題亦愈來愈令人關注。有政黨調查發現，近七成四受訪者擔心航拍侵犯私隱，約七成人擔心造成意外，逾八成人認為必須立法規管，包括發牌。負責調查嘅政黨指出，調查結果反映市民普遍對航拍感到擔憂，呼籲當局加強監管，嚴格執法，保障公衆安全。

咁又係吖，汽車喺路上行走尚且要受到規管，航拍器喺空中飛來飛去，而且係遙控嘅添，萬一機件失靈或者操縱失誤從天而降，分分鐘搞出人命都似。再講吖，航拍器自出自入隨時可以侵犯私隱，又點可以放任自流呢。

唔係講笑，幾日前日本東京就有一架航拍無人機墜落首相官邸，而且載有懷疑輻射液體嘅容器。事後附近一個公園驗出輻射超標二千倍，搞到要關閉，兩件事究竟有冇關聯，唔使講都知喇。試諗吓，如果航拍器墜落喺人來人往嘅鬧市，會有乜後果吖？

今時今日，無論傳媒追蹤、廣告拍攝定喜慶場面，都會用到航拍裝置，有人甚至當玩具添。愈多人玩航拍，風險自然愈高，英國舊年就發生兩宗民航客機幾乎同無人機相撞嘅驚險場面。而類似嘅空中驚魂本港亦發生過，月初一架來往港澳嘅直升機喺空中發現懷疑航拍器盤旋，為安全起見，搞到要報警求助。

航拍器安全風險多多，弊在本港法例對呢方面嘅監管嚴重不足，民航處嘅飛行安全指引只係針對鹵莽或疏忽操作而危害他人，只要飛行器唔超過七公斤就唔需要領牌，呢個明顯就係一個漏洞喇。而私隱專員公署嘅所謂指引，亦只係呼籲公衆留意保護私隱，純屬廢話，講咗等於冇講。

其實，航拍除咗帶來安全隱患及侵犯私隱等問題，而且隨時成為恐怖襲擊嘅武器。今時今日，恐怖組織陰魂不散，恐怖活動無日無之，尤其係極端組織伊斯蘭國更加令人防不勝防，早前有報道指本港印傭圈已被滲透，日前亦有本港商戶網站被黑客入侵，換上伊斯蘭國宣傳資料，證明本港絕非世外桃源，當局再唔加強監管，航拍器隨時變成恐怖組織嘅「戰鬥機」，叮！