政壇：肥仔明返立會惹拉票疑雲
前立法會議員李華明（肥仔明）日前現身立會餐廳。退下火線後，肥仔明開咗間公關顧問公司搵真銀，依家喺政改方案公布後重回舊地，唔通有搞作？
張華峰（左）同李華明喺餐廳相遇，即刻恭祝肥仔明生日快樂。
肥仔明呢日一大早八點幾便現身立法會餐廳，期間，仲同金融服務界議員張華峰（肥老闆）相遇，兩人笑哈哈閒談一陣，原來肥老闆恭喜肥仔明尋日「登陸」六字頭，開始六十歲嘅人生。咁壽星公有乜節目慶祝呢？肥仔明話，尋日同太太及女兒一家三口一齊去澳門慶祝生日，喺一間米芝蓮三星餐廳大歎美食。一家人齊齊偷閒過濠江，真係羨煞旁人，試諗吓，如果佢仲做緊立法會議員，肯定要出席拉緊布嘅預算案審議會議喇。
佢忽然現身立法會，一度惹來猜疑，唔通身兼政改民意關注組成員嘅佢嚟游說泛民主派議員支持政改方案？肥仔明話，佢只係就公司事務同黨友開會啫，同政改議題無關喎。
