政壇：搞搞政：難阻退聯潮羅冠聰變孤星
佔領行動以後，香港專上學生聯會（學聯）嘅支持率大跌，香港大學率先退聯，跟住又有理工大學及浸會大學，科技大學及城市大學亦已成立退聯關注組，退聯潮一發不可收拾，更引發分家嘅煩惱添。學聯秘書長羅冠聰（Nathan）上台之後，啲大學卻相繼退聯，唔同佢玩，真係慘情！
（設計圖片及對白）
千萬儲備金 分身家添煩
對於學聯釀成依家呢個殘局，有學聯老鬼就歸咎於學聯對退聯掉以輕心、懶懶閒。港大公投時，支持票只多過反對票約二百票，理大同浸大嘅支持票雖然較多，但其實投票人數並唔多，理大先啱啱夠一千七百人嘅法定人數，浸大投票率亦只有一成四。如果學聯認真啲拉票，情況可能逆轉。至於中文大學，尋日公布聯署有效簽名不足法定人數，無法啟動退聯公投，但中大退聯關注組已揚言會重新計劃聯署，或者尋求學生會代表會主動發動退聯公投嘅可能性。另一方面，中大學聯老鬼亦會發功，希望中大唔使退聯。
家吓已有三間大學退聯，學聯都面臨分身家嘅可能性，唔計學聯持有嘅物業，聽聞學聯凈係緊急儲備基金都有一千萬元，仲有日常戶口同早前就罷課及佔領行動而設嘅籌款戶口，儲備分分鐘逾二千萬元。萬一學聯真係瓦解，點樣處理呢筆錢？原來有錢分都係好頭痕嘅事。
