政壇：鬼祟貪曾中環笑騎騎現身
本港空氣污染情況嚴重，禍港七年嘅「貪曾」前特首曾蔭權爵士「肯肯定」係其中一個罪魁禍首，任內更被環保團體多次譏諷為「氣候逃犯」添。尋日我哋就目擊呢位「氣候逃犯」豪坐七人車排廢氣，攝氏二十幾度仲着住件深色唐裝褸，去到醫務所林立嘅萬邦行。見佢一路笑騎騎，似乎唔記得咗自己嘅貪腐醜聞被廉政公署查緊仲未解決喎。
「貪曾」曾蔭權（左）同太太鮑笑薇（中）中環出巡，隨行保鏢（右）出手擋鏡頭阻止拍攝。
保鏢批阻拍攝
貪曾任內臨尾香，被本報獨家踢爆任內「貪盡海陸空，歎盡省港澳」，因而被廉署立案調查，調查至今逾三年，律政司已經多次表明調查幾近完成，好快就有結果，但始終仍未有聲氣，令貪曾逍遙快活。話口未完，貪曾尋日傍晚近六點半鐘又出巡，同太太鮑笑薇坐七人車喺皇后大道中附近嘅戲院里燈位有落，同行仲有兩名保鏢傍住。
貪曾一路行一路笑騎騎，我哋問佢去邊？佢冇回應就行開，隨行保鏢亦唔係幾客氣，不但用手擋開鏡頭，仲出動批（月爭）伎倆阻止拍攝，真係出街都鬼祟過人。貪曾夫婦隨即一支箭走入醫務所聚集嘅萬邦行，莫非係去睇醫生？不過，貪曾入咗去好耐都唔見影，相信佢又由另一出口離開咗喇。
