扶康會尋日舉行烹飪比賽，請來一班立法會議員夥拍智障人士下廚，啲議員雖然着圍裙、戴埋廚師帽，但睇得唔打得，一揸起鑊鏟就雞手鴨腳，有人炒到成枱都係，有人煮到黐晒底，仲有人搶火添，嚇到主持人都驚叫「火燭呀」！

周中（左）讚胡志偉（右）拋鑊手勢唔錯。

有份參賽嘅議員胡志偉聲稱自細不時喺屋企煮飯，但係太太嫌佢成日搞到廚房污糟邋遢，次次都要幫佢執手尾，所以近年都唔畀佢入廚房。佢臨場表現唔差，拋鑊時有兩下姿勢，弊在食材落地，食物落枱。議員梁家傑仲論盡，佢一開波就搶火，嚇到主持人呱呱叫，拿拿聲換過一隻鑊，但一碟餸換咗三隻鑊，結果主持人都笑佢，平日講嘢經常火上加油，估唔到連煮嘢都唔例外！

講起煮餸，前排網上瘋傳醫科生用手術刀將雞隻完美起骨，名廚周中就話，手術刀雖然鋒利，但咁細把刀花幾個鐘都未煮完一道菜，所以都係咪搞喇！

第一手消息請下載on.cc東網iPhone/iPad/Android/Windows Phone Apps