政壇：張建宗挾持活動銷政改
自從政府打出「2017 一定要得」嘅口號後，全港性宣傳二○一七年特首普選方案嘅工程就啟動，政府今次又係全方位出動，問責高官及問責團隊更收晒柯打，瞓身搏盡，尋日政改三人組乘巴士巡遊港九新界宣傳政改方案，勞工及福利局局長張建宗雖然冇份，但佢出席另一個活動時都隔空幫口，甚至疑似挾持個場合嚟硬銷政改添！
（設計圖片及對白）
張建宗尋日出席中華總商會一個短片創作比賽嘅頒獎典禮，佢喺活動上講咗篇幾長嘅致詞，內容包括社會共融，扶助弱勢，最重要嘅卻係尾段，佢趁呢個場合大銷政改，兼宣傳反拉布。
盼盡快通過預算案撥款
佢話，二○一七年嘅普選不但係香港政制嘅重大跨越，更係國家嘅歷史大事喎，同時亦係本屆政府最重要嘅施政目標，佢話，五百萬人投票嘅機會不容有失，更呼籲大家珍惜呢個黃金機會。睇嚟，問責官員真係抓緊任何機會，幫口又幫手。
政改之外，佢都借兒童發展基金嘅話題食住上，宣傳反拉布。張建宗話，政府對兒童發展基金嘅額外注資撥款已經納入咗本年度財政預算案，希望立法會議員能盡快通過預算案，咁樣市民就可以早啲受惠。預算案涉及唔少低收入家庭嘅撥款，全部都同張建宗個局有關，所以佢早前已經打開口牌，呼籲議員唔好拉布，依家再講一次，真係將反拉布進行到底。
尋日個活動有唔少參加者及相關團體嘅與會人，張建宗借個場合幫政府宣傳政改同預算案兩大工程，直頭好似插入式廣告咁，其他問責高官真係可以學番兩招，只係唔知與會人士會唔會覺得個場合被挾持啫。
