政經民生樣樣亂 快樂一去不復返

呢，聯合國發表嘅全球快樂報告顯示，香港喺一百五十八個國家及地區中，只能排名七十二，比去年急跌八位，問你驚未。反觀其他亞洲國家及地區，新加坡排名二十四，成為亞洲最快樂國家；台灣就排名三十八，跳升四級。人哋上升，唯獨香港退步，唔止畀新加坡愈拋愈遠，而且成為亞洲四小龍嘅包尾大幡，真係乜嘢架都丟晒。

香港話晒都叫國際都會，港府更加係財政雄厚，肥到連襪都着唔落，點解港人愈來愈唔快樂呢？雖然話快樂未必同金錢有關，但大家只要睇吓聯合國嘅評分標準，就知道香港人點解唔快樂。

即係咁，全球快樂排名係根據人均生產總值、社會支援、平均健康壽命預期、人生抉擇自由、慷慨風氣、免於貪腐自由共六項因素制訂。香港經濟話就話唔算太差，就業情況亦相對穩定，幾乎全民就業添，可惜分配不公，導致富者愈富，貧者愈貧，基層打工仔人工加幅永遠追唔上通脹，生活質素不斷下降，咁又點可能快樂呢？仲有吖，樓價長升長有，租金水漲船高，而公營房屋又嚴重短缺，唔單止無殼蝸牛望樓興嘆，有啲中產人士亦被迫住劏房，連豬欄都爭崩頭，佢哋又點笑得出呢？

當然喇，香港快樂指數每況愈下，「免於貪腐自由」受損亦係其中一個原因，尤其係前特首曾蔭權爵士同前廉政專員湯顯明其身不正，嚴重破壞廉政及法治，當局查咗多年仍然無聲無息，唔止令市民失去信心，更加令香港國際形象受損，快樂排名唔跌至奇喇。

所以話，香港問題千頭萬緒，講起真係一匹布咁長。經濟低迷，民生凋敝，衣食住行樣樣艱難，深層次矛盾長期得唔到解決，市民已經谷到爆。加上政治爭拗無日無之，去年嘅佔領之亂幾乎令香港萬劫不復，而早前嘅連串反水客鬧劇更搞到烏煙瘴氣。

內地傳媒警告，香港繼續折騰，只會向「第三世界」一步步淪落。真係冇講錯o架，香港競爭力已經遠遠落後於新加坡，家陣反對派又全面不合作，立法會空轉，港府施政癱瘓，經濟民生完全冇人理，再咁落去，香港人點止唔快樂，直情痛苦添吖，叮！